左丁山夫婦因香港航空大誤點，10月18日朝早11時登機，晚上（日本時間七點半）先至到達鹿兒島，因機場國際航班只有一班，我地火速出閘上的士直奔城山酒店登記入住；未上房就去咗「水簾餐廳」先，此餐廳分壽司、鐵板燒、天婦羅及火鍋四部份，我地一行六人就鍾情火鍋，點咗四盤和牛，兩盤黑豚，吃個不亦樂乎。呢度食火鍋，唔會問你要乜湯底，只係注入一窩清水，包冇味精雞精，煮出嚟浸烏冬嘅熱湯，保證原汁原味。六個人食咗三萬幾日圓，每人預計約四百餘港元，用香港俗語講，如在香港日式火鍋店進食，就係有佢咁平，冇佢咁靚，有佢咁靚，冇佢咁平，次晚，親戚等人要試新，到山下一間由酒店介紹嘅日本餐廳吃刺身及和牛，結論就係城山勝人一籌，正是卡士不同也。
吃飽之後，因整日長時間困在香港航空機上，特別疲倦，浸溫泉都懶去咯，一睡到天明，次早吃其早餐自助餐，專揀麵包嚟食，因城山酒店麵包特別聞名，鬆軟味道正，牛油成份啱啱好，配以當地特產橙皮占、綠茶占、黑茶占及蜂蜜，零舍爽神。西式煎蛋之類，在曼谷四季酒店（現已改名）吃得精品多，無須在此地貪嘴，日式早餐係鍾意麵豉湯與鯛魚魚生啫（話明係真錦江灣真鯛），其他唔多啱口味，故此吃麵包吃個飽。酒店服務精神真係好，早餐10點完，9點55分還要refill魚生刺身。
此酒店房間並不豪華，以實用為主，但對於食物就非常講究，位於山頂，可望櫻島火山，對日本人特別有號召力，但今年多咗一個講普通話之女研修生（trainee），當是大勢所趨，強國人遊客日多之故。自駕遊可在停車場免費泊車，有穿梭車跟住，泊好車還可以上小巴返回酒店，可見其服務貼身之處，自己揸車上山要小心慢駛（日語叫徐行，比我地文雅得多），因上山路多彎，路不寬，如遇迎頭送貨車，就要讓路。
吃過早餐，就在餐廳外望火山，影相影個飽，所以今次左丁山學精咗，唔要住海景房，改住山景房，望海望櫻島嘅房間，每晚房租貴一倍有多，向內望山嘅，房租18150日圓，住兩晚唔駛用七至八萬日圓啫。親戚在第二晚落山試新，左丁山兩公婆就一於再探水簾，呢次食鐵板燒，左丁山點咗最貴嘅一款16000日圓，有生鮑魚、活龍蝦、A5活牛、鵝肝等等，老婆就要9000日圓嘅Ladies Course，一食就令左丁山諗起威靈頓街嘅「山下」鐵板燒，但呢套晚餐價係「山下」嘅午餐價錢，師傅手勢尤有過之，哎吔，食完呢次，有排都唔駛去「山下」㖭！