騎練潘頓同容天鵬剛周日分別起孖後，這晚快活谷一開場五班1200米，呢對旺人又時來運到，以19倍冷馬「世界都市」並肩作戰，結果此駒爆冷勝出，馬兒相隔兩年四個月重開勝門，造就騎練雙雙延續勝勢，組合獨贏開A3派64元。
容天鵬開季以來一直表現麻麻，直到剛周日起孖至叫做有轉機。這晚係「世界都市」連續第三次跑快活谷，六歲馬復配潘頓，守好位下直路追上贏頸位，服役初次贏谷草，馬房亦告打開今季谷戰勝門。而容天鵬妻女均黃衫黃鞋到場十分搶鏡，果然帶來好運。
容天鵬憑「世界都市」取得從練以來第100Win，練者表示此馬本身有四級喘鳴症，能夠重開勝門十分開心，計實力在五班有利，其實今仗並非易跑，幸而馬群扯得散，潘頓立即攝個靚位，贏得清脆伶落。
呢場最低班賽事二、三名由一對熱門「永恆光輝」（杜利萊）及「銘記心中」（韋達）順序瓜分，第四名係見習騎師黃皓楠座騎「盈喜悅」，四重彩派五萬三千幾。而郭能「齊齊歡欣」賽事早段曾展步欠順急劇大墮退，以為跛腳會拉停，但其後又跑得無大不妥，但仍要包尾過終點。