小弟同牽牛兄傾開今季有咩異軍，佢話幾欣賞賀維領軍嘅般尼茅夫打地面足球；至於小弟就想講吓德甲嘅RB萊比錫，呢支升班馬家陣排第二位，同拜仁慕尼黑一樣都係今季德甲嘅不敗之師。
RB萊比錫係紅牛集團培養咗七年嘅球隊，但唔太受歡迎，因為佢哋喺各方面都走法律罅，例如隊名改做RasenBallsport Leipzig，簡稱RB萊比錫，去避開唔准用商業機構做隊名嘅規例，但係人都明解RB係代表紅牛；仲有用高門檻嘅會員制度去符合聯賽制度，又確保集團話晒事。萊比錫崛起，全靠有大財團撐腰，紅牛唔單止畀錢，仲有衞星球會「輸血」畀佢用──紅牛集團喺全球都有球會，耳熟能詳嘅有紐約紅牛、巴西紅牛同奧地利嘅薩爾斯堡；為咗谷萊比錫上德甲，集團多次將薩爾斯堡啲猛將「賣」過去，例如拿比基達、貝拿度費南迪斯都係嚟自薩爾斯堡，搞到薩爾斯堡啲球迷好不滿，認為紅牛養肥薩爾斯堡去供養萊比錫。萊比錫七年升五級，背後唔單止掟錢就搞掂，係出盡法寶㗎；從另一個角度睇，紅牛呢次投資真係好有耐性同心機。
一個集團擁有幾隊波，可以產生協同效應，先驅有意大利嘅普素家族，曾經擁有烏甸尼斯、屈福特同CF格蘭納達，雖然後者賣咗畀中國人，但家陣烏軍同屈仔啲人都成日撈亂用。另外，城市足球集團亦有曼城做龍頭，加埋紐約城同墨爾本城；中國嘅蘇寧集團就先買起中超嘅江蘇，變身江蘇蘇寧，今年再買埋國際米蘭。等睇有朝一日，巴西翼鋒阿歷士泰斯拿俾中國總公司派去米蘭分公司出差，支援吓成績唔多掂嘅國米。
文：咖喱