Viu TV早前突然抽起八九學運領袖王丹及港大學生會前會長馮敬恩已拍攝的《跟住矛盾去旅行》，引發社會熱議。Viu TV前日凌晨在其fb專頁上一幅「面對。改進。感謝」圖片，指已收到大家批評聲音，未來會繼續改善，但大量網民表明「唔收貨」。
Viu TV以多張網民就事件的負評留言截圖作背景，又加上大字「面對。改進。感謝」的字句，希望一眾網民觀眾繼續支持，「希望有一日我哋真係做得好，會再得到你嘅支持」。
有網民批評圖片是「攞景定贈興」、又有人留言指「已經冇睇好耐」，Viu TV fb管理員卻回覆指「明嘅，我諗我都要轉去睇幕後玩家學吓嘢」，隨即又引來網民留言圍剿，批評管理員「人哋話無睇好耐你就串人睇cctvb，咁樣叫悔改？咁樣叫公關？食屎啦。」
不過亦有不少人留言指，問題不在基層員工而在高層，「今次真係又要威又要戴頭盔」，希望前線員工加油。
事件主角之一的馮敬恩日前在fb發帖指，自從Viutv事情後，街上的人又將他的面相從記憶深處重新召喚上來，「指罵的指罵，以以為我聽不到但其實我聽得到的聲音來講馮敬恩三個字」；他又感嘆指，「一件錯誤的事情無論有多少人支持，也改變不了其錯誤的本質。」