有「中國梅鐸」之稱嘅黎瑞剛自從投資TVB（511）後，香港人開始對佢有啲認識，其實佢喺內地傳媒業有極高嘅江湖地位，行內人都尊稱佢做「黎叔」。
近年內地大搞娛樂文化產業，簡直開正黎叔條水，佢間華人文化產業基金（CMC）四出投資娛樂文化產業，在港除咗TVB，仲買入美克（953）隻殼，轉型搞電影，改埋名叫「邵氏兄弟」，又特登委任TVB高層樂易玲去邵氏兄弟做執董，黎叔擺明想將邵氏兄弟變做TVB嘅電影旗艦喇。
為表重視，黎叔噚日開始擔任邵氏兄弟非執行董事及董事會主席，係黎叔第一間做主席嘅香港上市公司（佢係TVB副主席咋），黎叔搵埋兩名幫手姜偉與許濤入董事局做執董㖭。
根據公告，黎叔收邵氏兄弟每年主席袍金36萬，多過TVB畀佢嘅25萬袍金。