公民黨畀人嘅印象係大狀黨，唔少領導層嚟自法律界，但似乎佢哋嘅law味會慢慢淡化，取而代之嘅係「戲」味！點解？皆因繼梁家傑囡囡Jennifer揀咗演藝之路，世界巡迴演出莎劇，「總舵主」陳家洛嘅細孖Kaja，最近亦踏台板喺莎劇《十二夜》中反串女扮男。
《十二夜》反串
八方問過總舵主，佢話Kaja喺年半前，由學校老師得知「Bravo!香港青年劇場獎勵計劃」，呢個係一個橫跨香港、台北同倫敦嘅雙語戲劇及生命教育計劃，對象係13至18歲嘅香港全日制學生，今年15歲嘅Kaja參加咗，其後用咗唔知幾多個周末同夜晚排戲，暑假仲要去埋倫敦音樂及戲劇藝術學院 （LAMDA）進行一個月嘅學習交流，毅力同專注力都嚇佢一驚。
細孖上周六晚登場，作為老竇當然有捧場，而呢次原來係Kaja第二次演出，陳家洛估計，細孖似乎都希望喺呢方面發展，作為老竇又點會唔支持？佢同時好支持舉辦計劃嘅非牟利劇團Aftec（誇啦啦），話為年輕人提供咗好多機會。