經民聯梁君彥當選立法會主席過程波折重重，最近仲因為青政嘅宣誓風波搞到一身蟻，由批准兩人再宣誓後嚟個大U turn，賠上主席公信力。勢估唔到，連刻有佢個名、用作說明主席任期嘅木板，「上位」過程亦唔暢順。
噚日晏晝兩點零，大批傳媒喺立法會走廊等梁君彥宣佈議員宣誓安排，幾位工人突然抬住一大塊刻有梁君彥同歷任立法會主席名稱同出任主席年份嘅木板現身立法會走廊，其間先後五次嘗試將木板掛上牆身，但疑因塊版背後嘅嵌入位有問題，所以「五上五落」後，塊板仍然唔上唔落。
最終工人將塊木板移去立法會議員前廳「稍事休息」後，第六次先至成功掛上。社民連長毛經過走廊時不忘寸爆話梁君彥好快落台，叫工人唔使掛得咁辛苦，以免又要拆返落嚟。