幾位港獨派議員嘅宣誓問題搞到滿城風雨，特首梁振英仲破天荒提出司法覆核，唔畀兩位民選議員宣誓就任。好多人都話CY呢次要法庭干預立法機關運作，破壞香港司法制度。其實5年前今日，前港督彭定康評論特首人選嗰陣就講過法治嘅重要，好有先見之明。
肥彭5年前訪港時，被問到點睇CY同唐唐兩位特首候選人，佢呢啲政治高手當然避重就輕，話自己唔多識CY同唐唐，只係覺得做特首最重要係了解香港過去成功嘅因素，包括獨立嘅司法制度、一國兩制等，總之一定要維持香港嘅競爭優勢。
相信大家亦記得肥彭做港督時嘅最後一份施政報告講過，佢憂慮嘅唔係香港嘅自主權會被北京剝奪，而係一點一滴地斷送喺香港某啲人手裏。今日睇番肥彭嘅言論，真係令人無限欷歔。