最近jobsDB嘅職場調查報告，原來職級達經理嘅管理層最唔快樂，噚日又一例證！前晚南華喺港超聯爆冷以2:4輸咗畀理文流浪，擁南躉當然唔收貨，估唔到高層噚日即刻開會檢討，結果上季轉做看守教練嘅列卡度成為犧牲品，今季領軍喺本地賽輸咗一場波箒，都即刻被「燉冬菇」，由教練變做助教。足主張廣勇話，球隊好快會由顧問接手球隊喎。
南華前晚輸畀流浪，噚日全隊加操，準備周六對和富大埔嘅銀牌八強，不過教練列卡度同顧錦輝等教練團成員冇帶隊。原來佢哋俾足主張廣勇叫晒去開會，成班球員好自由咁活動，夠鐘就收操。
列卡度燉冬菇變助教
擁南躉前晚賽後狂轟教練列卡度嘅換人調動不當，領先2:1時反而換走防守中場羅素，被流浪追平2:2後仲換走埋中堅保贊，臨尾如同不設防，連輸兩個突擊，搞到輸2:4，一分不保。南華今季不敗身被破，球迷當然狂鬧，向來好重視球迷意見嘅張廣勇，當然要即時做嘢啦，結果列卡度冇得繼續做看守教練，好在唔使執包袱，只係降職做助教。
張廣勇話，輸波係好大教訓，所以要變，之前畀列卡度做看守教練，因為未搵到合適教練，會上決定之後安排佢做番助教。至於周六對大埔場波，就由南華教練團帶隊，新任顧問當日亦會亮相。早前盛傳前傑志教頭狄恩，有意接掌南華，但呢位曾經教港隊嘅教練，早排病咗住緊醫院，據聞佢教嘅機會唔高。至於邊個會係南華新任教練，有傳係一位本地名宿喎。
自從張廣勇14年接手南華後，教練換唔停，先後有楊正光、馬里奧及米路被炒，列卡度仲係兩次坐正㖭。張廣勇仲話會有新進攻中場外援加盟，希望畀多啲波高美斯。有新援嚟，自然有舊援被棄，至於邊個，有傳係今季未落過場嘅門將摩拉。