參孫俾人剪晒啲頭髮後力量盡失，但俄羅斯球手古絲妮索娃全靠剪咗啲頭髮，周一先可以喺WTA女子年終賽白組分組賽贏波蘭球手拉雲絲卡。
八號種籽古絲妮索娃對住二號種籽拉雲絲卡，第一盤贏7:5，但第二盤就輸番1:6。去到第三盤初段，佢無啦啦問裁判攞把鉸剪，剪咗自己條辮，最終順利贏7:5，以盤數2:1贏波。古絲妮索娃賽後話：「條辮搞到我好煩，我想塞佢入個頭帶度，但我啲頭髮太厚太重。每次我正手抽擊，條辮就打到我對眼。我問自己究竟邊樣嘢重要啲？於是我決定剪咗佢。」
不過，拉雲絲卡話唔明古絲妮索娃點解咁做：「我唔明囉。好彩佢唔係剪其他嘢，我認為頭髮對佢嚟講唔係太重要啩。」同組另一場分組賽，四號種籽捷克嘅比莉絲高娃就以6:2、6:7同埋7:5，擊敗五號種籽西班牙嘅梅古露莎。
姬芭輕鬆挫哈蕾普
至於贏咗今年澳網同美網兩個大滿貫女單冠軍嘅德國球手姬芭，周二喺女子年終賽就順利擊敗哈蕾普，而取得兩連勝。
頭號種籽姬芭喺紅組分組賽，對住三號種籽羅馬尼亞嘅哈蕾普，未遇到太大考驗，輕鬆以6:4、6:2贏出。