親戚放假，到福崗自駕遊，南下鹿兒島。事前左丁山向他兩夫婦推薦鹿兒島城山酒店及指宿白水館，之後想起去年8月喺呢兩個地方浸溫泉嘅情景，心意一動，自己都想去埋一份。但親戚早已卜好港龍航班（10月17日）往福崗，次日租車駛往鹿兒島，而左丁山剛好在10月17日有會開兼安排一個晚飯飯局，不能失信於人，臨時甩底嘅啫。於是請日本專家肥仔K上網搜尋方法，佢話最快就係坐唯一直航鹿兒島嘅廉航香港航空，剛好星期二有中午班機，去到啱啱好，嘆完下午茶就能與親戚一齊在城山酒店享用和牛黑豚火鍋。於是火速行動，上網訂機票酒店，星期二去，星期五黃昏回港。星期日又可跑馬，幾正斗，時間fit晒。
點知世事永遠不如計劃咁理想。10月18日十一時許登機，12時飛機啟動，滿以為廉航冇得頂，來回2400元（計埋揀位費及午餐費），夠便宜，比國泰還要準時。於是安心瞌埋雙眼去見周公，誰知被機師宣佈驚醒……睇吓個錶，已是12時45分。機長話，飛機在跑道滑行，發覺引擎有啲唔妥，決定返回泊位，搵檢查人員上機安檢，一於安全第一。講得係冇錯嘅，檢呀檢呀，檢到兩點幾，跟住又話要加油，簽文件匯報當局，三點幾話開機咯喎，跟住要在跑道輪流排隊起飛，如是者已到下午四時，香港乘客水平好高，冇人嘈，冇人要去廁所（成四個鐘頭喎），只係默默地等候。
卒之飛上天空嘞，之後就有水飲，去廁所排長龍，降落鹿兒島已是日本時間七點半，困在飛機上超過七個小時，最弊當初以為小睡二小時就到，冇預備麵包，亦冇帶書上機，唔學得吳局長咁在機上消化十本八本書，簡直係浪費時間！冇法啦，一落機開番電話，已睇到親戚WhatsApp，佢在城山酒店查到香港航空遲大到，就將晚飯延後到8時半。左丁山與老婆唔搭巴士入城咯，立即叫的士直奔城山酒店，的士站（國際線）有兩部的士等客，又有人在場幫手搬行李，一望，於心不忍也，兩人年紀都似乎大過左丁山，司機更加老，但揸車夠快夠穩，45分鐘內到達酒店，只見有長長的士龍在外，已經夜啦，何來有人搭的士落山呀？日本的士可能係極艱苦行業，車多人客少，司機老邁超齡，但難得個個穿西裝或打呔，禮貌周周，中台港的士司機好難做得到。