田少發火，非同小可。邊個激到田少嬲嬲豬？除咗一男子，仲有另一人，原來係自由黨新任主席張宇人，皆因聽到張宇人話ABC（Anyone But CY）唔係該黨政綱，只係田北俊嘅個人路線，覺得非常哽耳，直指張宇人不代表自由黨，繼續ABC先至令個黨站在民意一邊，預告如果張宇人一如傳聞加入行會，唔該辭任主席，否則動議罷免佢㖭呀！
「變咗經民聯？」
查實田少咁緊張，高調申明無放棄ABC，都係擔心自由黨若離棄民意，唔同反對梁振英連任嘅六成市民同一陣線，就會同其他建制派冇分別，凡事阿爺話乜都支持，「一吹雞就歸隊，咁咪變咗經民聯？」
田少越講越勞氣，指張宇人稱自由黨從未高舉ABC旗幟，但自己參選新東時，對方都有嚟為佢站台拉票喎，強調自由黨四百幾人係社會嘅縮影，若逾六成人反對CY連任，作為政黨都要注重，「我係對事唔係對人，我係代表市民，所以繼續ABC」，指自由黨若然放棄此路線，「我相信好多人會退黨」，「社會或者對我哋好失望」。
咁張宇人點解唔高舉ABC旗幟？田少估計，對方想入行會喎，仲話張宇人一直唔多理黨務、黨內認受性唔算高，唔代表自由黨，如果真係入行會，請佢退任主席，似乎真係要同張宇人開戰。唔知早前回應過，話政府冇搵過佢入行會嘅張宇人，如何接田少呢一招？
李八方
mailto:[email protected]