立法會之前陸續選出各委員會正、副主席，民主派同建制派協調失敗，雙方冧人加入所有委員會，最終18個事務委員會中有16個嘅委員人數超過60人，如果議員真係出席晒應該好唔得閒，而且法定人數係委員人數嘅三分一，即係要湊夠廿幾人先可以開會，對於原本無意加入有關委員會嘅議員，都唔可以缺席，否則隨時流會。
以往爭位後，議員都會過一排先無聲無息咁退出，有議員同八方講好想退出部份委員會，但又唔想做第一個，惟有硬住頭皮繼續開會。
估唔到九西女將「身先士卒」，經民聯梁美芬至今一口氣退出7個事務委員會，包括發展、工商、財經、環境等，公民黨毛孟靜亦退出環境事務委員會，相信其他議員都好快有樣學樣，真係要多謝九西女將勇敢行出第一步。