華置（127）大股東劉鑾雄（大劉）近年身體狀況麻麻，佢公司亦不停沽售資產套現，轉頭大派股息，袋得最多股息嘅，當然係大劉喇。最近華置又賣資產，將灣仔尚翹峰商場連停車場，一齊以5.6億元，賣畀「舖王波叔」鄧成波，唔知今次有冇息派呢？
比叫價低6%
華置近年頻頻賣資產，除咗出售西半山璈珀、堅尼地城南里壹號等住宅項目，好多收租物業亦賣得就賣。最新消息，就連入伙之後收租10年嘅尚翹峰商場連停車場，華置都賣咗畀波叔，成交價比之前叫價低6%。
呢個商場主要租客係酒家，包括新界圍村起家嘅季季紅，每月收租82.9萬元；停車場共50個車位，每個大約作價113萬元沽出。
相對華置之前出售嘅項目，好似灣仔美國萬通大廈、尖沙嘴The ONE等等，每個項目講緊幾十億，甚至過百億元，呢單刁嘅金額相對較細，唔知華置會否派息，不過就算派，由於項目係華置與市建局合作，華置本身唔係袋晒5億幾，要同市建局瓜分，華置冇咁多可以派。
不過，華置由2003年至今，累計狂派480億元股息，大劉袋走其中大約350億元，已經十分和味。根據年報資料，華置目前仲有銅鑼灣地帶、夏慤大廈兩項比較貴重嘅收租物業未賣㗎。
李華華
mailto:[email protected]
