城規會舊年開綠燈嘅落馬洲新田邊境購物城有新消息！項目牽頭人、民建聯立法會議員「象哥」黃定光同八方講，購物城地底工程基本已完成，噚日開始做地面構建同埋豎立組合屋嘅樁柱。如果一切順利，可能趕得切喺今年底或者明年初投入營運。
睇番象哥早前派嘅宣傳單張，顯示新田購物城佔地42萬呎，可容納200幾間商舖，面積介乎300至1,000平方呎，呎租67至107元不等，一半店舖為香港品牌，三成賣奶粉等日用品，其餘租畀社企同餐飲，租約暫訂兩年。咁𠵱家到底有咩品牌申請？象哥耍手擰頭話唔講得，淨係話「啲人相當踴躍」，將來會有個遴選小組㖭喎！