不認不認還須認，搞了幾個星期，Note 7終究難逃全球回收的命運，從公關角度看，一句話：早知如此，何必當初。
現代企業危機處理，停售回收是必修科，但也是極其容易的一科，因為原理很簡單，品牌建立，絕非易事，當中必涉經年累月的心與血、起與跌，但要毀之，卻可以發生在一夜之間。那麼產品出了問題，要挽回巿場的信心，就是先擺出誠意，唔理衰乜，因為衰了，企業為維護顧客利益，第一時間就要認錯兼回收，讓巿場消氣兼降溫，是取回控制權第一步。梗係有損盈利啦，但為了挽回形象與聲譽，你其實冇得揀，也實在是一種止蝕。
今次Note 7叫fans失望，因為佢竟然反其道而行，一時話香港啲貨冇問題，一時又話淨係衰電池，在海外回收又鬼祟扮exchange programme，死都唔肯全面回收。好喇，最後航空公司紛紛唔畀帶上機，死未？這時才就範，企業形象已經大大失分，第日我仲信唔信你好先？
唉，講講吓又諗起香港嘅亂局，今次兩位政壇新人玩嘢玩出火，好多巿民真心嬲，覺得無論如何幫唔落，連部份舊泛民看清形勢後都唔再敢盲目幫拖，建制執到好籌見有民意支持當然咬住唔放，仲醒到以其人之道玩離席癱瘓議會，唔畀你補飛，當下就是僵局一個，呢個遊戲，起碼玩到11月3日。
即咁樣，純學術討論抽離一點看，兩位新人其實不是無選擇，仲有一線生機可以正式做咗議員先，就係學企業止蝕囉，先跪低一鋪，向全世界道歉，咁建制就再冇藉口唔開會，一開會，就一字不漏完成宣誓，當日參選，都係諗住做嘅，係嘛？
彭瑪莉
mailto:[email protected]