選委會選舉揭開戰幔，但係有10席嘅天主教就唔使競爭，因為天主教會一如以往，由教徒報名，然後抽籤選出10人選特首。唔再係立法會議員、身為天主教徒嘅公民黨余若薇，本來打算抽埋一份，但決定打退堂鼓，原來係一個字嚇退余小姐，就係「煩」。
自覺抽籤命水麻麻哋
Audrey話，要參與呢場抽籤原來好煩，除咗要交領洗證副本，仲要請人證明自己同天主教會有密切聯繫，總之煩人又煩到自己，加上自覺向來抽籤嘅命水麻麻哋，最後都係決定唔去馬。
本身亦都係資深大律師嘅Audrey話，本來可透過法律界出戰，但係佢聽聞法律界已經夠晒人出戰，最終決定同大部份香港人一樣，做塘邊鶴觀戰就算。