喺上周五、周六期間，美股跌、人仔跌，港股黑期都唔跌，似乎預示港股有能力出現短線反彈，於是恒指更加喺周一突然由跌轉升，資金同時湧入二、三線股同細價股，成交額增加到740億元，突然活躍起嚟。
之前兩次恒指升到24000點附近，都有單日過800億元成交跌市出現，阻力位前有龐大沽壓沽番轉頭，睇怕要有足夠動力突破24000點難關，實在不容易。呢一刻去追貨，係無厘頭地博大單邊升市出現，市場上個個情緒冷靜冇人去癲，自己就無謂去幻想一個癲喪升市劇本。眼前更大嘅可能性，係成交一大，就接近反彈浪頂部，快將冚檔轉升為跌。
與此同時，個別二、三線股大成交破頂，高位加速消耗購買力，反而伏味濃，係減持食糊嘅訊號，套現出嚟，一係轉吼其他潛力精選股，搵唔到對象就增持現金，等到強勢股由高位整固，先至考慮再吸納，相信撈貨價會比現價為低。
之前推介嘅煤炭股、吉利（175）都升到爆燈，至於集優（2345）只出現第一棍陽燭，睇嚟由前者換後者，都係可行策略。
晉佳
http://fb.com/advanceguy1