金融界入面，經常曝光教人投資嘅靚仔唔多，專叫人投資ETF嘅葉浩文（Kirk Yip）係其中之一，不過以後大家少咗機會喺電視或報紙見到佢喇，事關佢冇做惠理（806），轉咗去幫復星（656）老闆郭廣昌打工。
Kirk之前喺惠理做ETF業務拓展高級副總裁，一做2、3年，噚日正式返新工，去咗復星母公司復星集團旗下復星資本，title係執行總經理。佢話，新工作主要幫復星嘅投資項目物色海外投資者，亦會設計基金。
佢覺得推ETF嘅工作已經做得差不多，ETF市場本身需要好多人配合，包括監管機構，難以佢一己之力，令到呢個市場再有顯著增長，咁啱有新機會出現，佢覺得發展機會吸引，咁咪轉工囉。
雖然佢以往負責代表公司出鏡講ETF，但佢強調，新工作性質不同，佢並非復星發言人，以後會轉趨低調咁話。