新世界發展（017）創辦人鄭裕彤（彤叔）仙遊，消息未有刺激系內股份，反而有隻「彤叔概念股」忽然熱炒，就係令唔少股民又愛又恨嘅蒙古能源（276）。正當大家估緊呢隻由「彤叔掌櫃」魯連城做主席嘅蒙能有乜大計時，噚日公司就公佈，委任魯連城位公子魯士奇（Rex）做非執董，似係想加強市場對蒙能嘅無限想像喎。
魯連城一向低調，財金界對Rex嘅認識亦唔多，蒙能張通告只係介紹Rex今年35歲，喺物業業務同一般管理擁有逾7年經驗，有電子商貿、互聯網工程理學碩士與工商管理理學士學位，但冇講邊間大學畢業，以佢呢個電商同互聯工程背景，唔通蒙能想轉搞網上賣煤？
翻查資料，Rex早於3年前，曾申報過持有申基國際（2310）54%長倉股份，不過當時冇乜人報道佢係魯連城位公子，加上不足8個月，Rex又冇持有申基，成件事都冇乜人留意，但相信傳媒今後都會留意Rex嘅一舉一動嘞。