【本報訊】初中中史課程改革首階段諮詢問卷只發給校長及中史科科主任，前線教師及學生則欠奉。有中學生團體指諮詢文件多次提及「國民身份認同」，「咁到底係咪（國民教育）騎劫咗中史課？」
中四學生、中學生議會候任議員鄺澔儀稱，閱畢諮詢文件後感到「好苦惱」，「1997年（中史科課綱）只係講要認識民族、本土文化同歷史，但𠵱家就係提升國民身份認同、認識多啲國家、認識多啲香港喺中國之間嘅角色同關係，好多都係以國家歸屬感為主語」。
「孫中山都係略略講」
鄺續指，現行課程與局方建議的新課程，同樣有內容太多的問題，「𠵱家課程一去到中二、中三就要趕書，教到中華人民共和國成立就完，後面啲民國時期通常都係略略講吓孫中山，文化大革命、六四直頭無教；如果再加香港史，我第一時間係諗教唔教得晒啊？」
她又指常感初中中史科「好悶」，「尤其古代史真係好悶，好似古代社會經濟史、貨幣制度、當時社會概況呢啲真係完全唔想讀，感覺同自己無關」，建議刪減遠古時期的制度或經濟史。
■記者葉偉東