曹永廉日前喺新加坡拎咗個大台豬肉獎，開心嘅，因為阿廉自23年前加入大台起，男配角嘅地位終於受肯定。無錯，做咗咁多年，阿廉喺08年《 美麗高解像》演過一次男主角，不過套劇係講女藝人點爭名逐利，呢個男主角綠葉味都幾重下。
阿廉開始拍劇嘅時候其實運氣唔錯，99年為《雙面伊人》做第二男主角，之後又加入咗《妙手仁心》系列拍咗兩輯，跟住又有《戇夫成龍》同《阿旺新傳》，數數埋埋參與過嘅話題作唔少，但每次焦點都唔喺佢身上。直至近年，佢喺《大太監》同《公公出宮》扮太監，先令人有多啲印象。
《公公出宮》入面，阿廉飾演太監「細雞」，嗰種陰聲細氣，做決定時猶豫不決，真係乸到出汁；仲要拍住林夏薇，一個陰陽錯配嘅紅合真係爆出幾多笑料，又能喺觀眾心中留下一個深刻嘅印象。
聽聽下，有冇發現同阿廉合作嘅對手，都紅極一時呢？好似《洗冤錄II》就有師奶殺手歐陽震華；《妙手仁心》系列有林保怡同吳啟華；《戇夫成龍》同《大太監》就拍住兩位視帝郭晉安同黎耀祥。
而女對手方面，列出嚟真係美女如雲，好似有陳法拉、楊怡、廖碧兒、陳慧珊、蔡少芬、姚嘉莉咁，真係好艷福呀。