冇見一排嘅金庸，最近重出江湖，但唔係有新作面世，而係控告內地作家江南侵權。中央社報道，粉絲遍佈中港台嘅金庸，控告中國幻想文學作家江南嘅著作《此間的少年》侵權，要求賠償500萬元人民幣（約572萬港元）。
《此間的少年》15年前創作
綜合《南方都市報》同新浪微博嘅報道，93歲、本名查良鏞嘅金庸喺10月11日向廣州天河區人民法院遞交狀書，控告本名楊治嘅江南同相關出版公司侵權，要求江南立即停止侵犯著作權及作不正當嘅競爭行為，要停止複製、發行上述小說，封存並銷毀庫存圖書，同時要公開道歉。
激到金庸發火嘅《此間的少年》，原來係江南嘅第一部作品，最初係喺網上發表，故事時代背景係宋代嘉佑年，講述喺汴京大學，喬峰、郭靖、令狐沖等人嘅校園故事。吓？喬峰、郭靖、令狐沖，之咪就係金庸筆下嘅人物，點解武林中人會喺大學度出現？金庸唔㷫就假咯！
江南接受傳媒訪問時直認《此間的少年》借用咗金庸小說中嘅人物名，但佢話當時覺得呢本係校園小說，諮詢律師話冇事先出版。佢喺發出嘅聲明中則指，15年前落筆創作時，只係想寫出自己同身邊人士嘅校園故事，自己仲代入咗令狐沖呢個角色，並冇侵權想法，更冇諗過同自己喜愛嘅作家交流，竟然係司法層面。佢話抱歉22歲時嘅唐突，為金庸造成困擾，強調無論今昔，一如既往尊敬金庸嘅為人同佢嘅作品。
李八方
mailto:[email protected]