【本報訊】自由黨參加立法會直選，成效不彰，隨着田北俊排名單第二無法於新界東冧莊，立法會直選議席變回零。張宇人以做生意為喻，「我哋（直選）用好多錢，個成效確實唔係太好」，不過政黨發展始終非凡事向錢看，張宇人表明，「做生意嚟講，係應該收工唔使做、長痛不如短痛，但我哋會繼續直選同功能組別，兩條腿走路。」
邀第二梯隊列席黨團
張宇人表示，自由黨正檢討立法會選舉工程，已叮囑地區或總部職員，「未來要幾多錢（推動地區事務）、會用咗去邊，做個預算」，強調會在經濟能力許可下繼續推動參與直選，不會因這次直選零議席而「收工」。
張宇人承認代表中小企、工商界的自由黨參加直選，有一定困難，例如不像其他政黨，能以支持派錢爭取支持，「我哋一直係希望搞好社會、搞好營商環境，畀啲經濟誘因大家發展，希望社會有個安全網。」
張宇人希望日後參加立法會地區直選的自由黨員，能孭着此立場出戰選舉，而新一屆自由黨黨團更邀請第二梯隊等列席會議，「希望畀佢哋知道個黨喺某啲政策立場係乜、係點樣傾出嚟，好似畀個補習班佢哋，等佢哋易啲上手。」
■記者許偉賢