現年29歲、𡃁模出身的郭穎兒（Celia K.）去年8月撻着文詠珊（Janice Man）舊愛李冠鋒，今年7月忽然閃嫁，8月在社交網晒婚戒宣佈已為人妻，昨晚在金鐘萬豪酒店補擺喜酒，何珮瑜（Jeana）及施念慈等人都有出席。
避談舊愛JM
一對新人按照傳統，Celia前一晚穿上紅睡衣進行上頭儀式，新郎昨日早上9時便抵達酒店接新娘，雖然明知會被姊妹大整蠱，但阿鋒為表誠意，完全豁出去任玩。昨午Celia接受本報訪問時笑說：「我一直喺房等，當時睇唔到佢哋玩乜，但聽到聲知道好激烈，知道佢哋準備咗抽獎箱，入面有蟲、有青蛙仔，要阿鋒喺入面夾啲好意頭食物出嚟。另外有唱歌跳舞，同埋有講愛的宣言，都好感動。」昨晚婚宴由C AllStar的梁釗峰任司儀，一對新人婚宴前應傳媒要求連咀兩次。問慣不慣被叫李太？Celia說：「都OK，但叫郭小姐應得快啲！」有否被老公感動落淚？她笑說：「佢做得唔夠好囉，感動唔到我，但斟茶嗰時有感動嘅！」何時計劃生小朋友？她說：「都有嘅，大家都鍾意小朋友。」問是否不設防？李冠鋒笑言：「等我準備吓先啦！」再問李冠鋒可有收到舊愛JM的祝賀？他即說：「冇聯絡好耐，都係咸豐年前嘅事喇！」
首次做姊妹
昨日兄弟姊妹團共有九男九女，寓意長長久久，有份做姊妹的還包括Celia師姐陳靜（DaDa）。DaDa與Celia相識十年，今次獲Celia邀請做姊妹，見證自己出嫁，DaDa昨接受本報訪問時表示：「好開心，今日Celia好靚，我將第一次做姊妹獻咗畀Celia，今日見證Celia幸福，我都希望快啲得到幸福。」笑問DaDa自己可有恨嫁的心？她即笑說：「咁又唔恨喎！」DaDa續說：「我結婚一定唔會搞婚禮，因為鍾意旅行，應該會好似舒淇咁簡單啲。」
採訪：陳杰、黃曉妍
攝影：葉君海、陳俊強
