社民連副主席黃浩銘噚日28歲生日，外號「村長」嘅佢同八方話當年，自稱一直係奀皮仔，唔知係咪成日紮紮跳無時停，所以擅長跑步，就算從來無練習，但一到學校運動會參賽都會拎到獎牌。雖然輸畀田徑隊同學，但都有亞軍或季軍㗎。
係人都知阿銘有個「真．村長」爸爸，就係沙田下禾輋村非原居民村長黃裕財，而佢由細到大則由爺爺湊大，感情特別好。佢透露多年咁落力爭取全民退休保障都係因為爺爺，因爺爺晚年生活都幾清貧，好想所有長者都可以安享晚年。原來爺爺喺佢廿歲生日前一日過世，阿銘當時喊爆，早前參選立法會都有拍片講返同爺爺嘅小故事。
返過內地服務兒童
阿銘中學就讀沙田培英中學，先後成為理大社會科學系社會政策學士及中大社會工作系社會政策碩士。佢話喺中大碩士畢業禮上曾指天篤地，原來係喺台上抗議緊，因為後面坐喺度嘅其中一個主禮嘉賓係勞工及福利局局長張建宗，當時喺台上高呼：「設立全民退保，張建宗下台！」原來阿銘讀大學時返過內地做實習，負責兒童服務，𠵱家當然唔再北上啦！
