今年52歲嘅曹永廉，日前喺新加坡拎咗大台男配角獎，好感慨咁話29，30歲加入大台，終於受到肯定冇入錯行。
查實阿廉91年以歌手身份出道，當時已經係27歲唔算後生，仲曾經為呢個歌星夢欠落10幾萬債，之後大台用人之際，就趁機轉型做演員。
結果佢一做就做咗廿年有多，神奇嘅係，呢廿幾年嚟阿廉好似冇老過咁，無論係皮膚定身型，都keep得住廿幾歲咁當打。
要數番阿廉最老成嘅造型，就要講下06年嘅《法證先鋒》，佢為咗演差人留咗鬚，睇上去先比其他年代有少少分別，甚至老積過佢前晚去新加坡個樣。唔知阿廉有乜保養心得，分享下，等一班成日要為凍齡傷腦筋嘅女士唔好咁頭痛吖！