廣東歌的第一代填詞大師鄭國江，75歲的他筆下近三千首作品，路家敏《小時候》、張國榮《風繼續吹》、梅艷芳《似水流年》、陳百強《眼淚為你流》、譚詠麟《誰可改變》等，都是流傳至今的好歌，80年代跟黃霑、盧國沾鼎立詞壇的他說：「我哋幾個人成日比試武功，但唔會明刀明槍過招。」
撰文：余燕儀
身為詞人又是伍華小學創校老師的鄭國江，日前重返學校接受本報專訪，當年他跟黃霑和盧國沾三強鼎立，他覺得三人各有風格：「娛樂唱片公司劉太同我講，覺得我寫嘅情歌唔夠深刻，佢想要黃霑、盧國沾嘅風格，但我有我寫法，《偏偏喜歡你》、《眼淚為你流》寫年輕人嘅愛情觀點會深刻，我勉強都做唔到。」
宇宙鬥世界
鄭國江認為三人不需要比較：「佢哋都寫唔到我嗰類，盧國沾有句好好嘅感覺：『我哋好似三個武林高手，冇比武過招，不過會遙遙觀察。』你有新招，我諗點破解，如黃霑寫『世界真細小小小』，到我寫《小時候》就『小小的宇宙』，你世界真細小，我宇宙大過你！」
自嘲沒記性的鄭國江，兒時愛唱歌卻常忘記歌詞：「要唱埋就要自己作落去，7、8歲已經砌歌詞，從來冇諗填詞係工作，老師話千祈唔好將興趣用嚟搵食，變職業遇失落會連興趣都憎埋，所以我將教書當工作，填詞係興趣。」當年鄭國江在麗的擔任綜藝策劃，那年頭國語歌最流行：「監製覺得香港98%人講廣東話，不如將國語改做廣東歌，我嘅拍檔唔想做呢樣嘢，諗住我係新人畀我做，冇人會諗到有個儍瓜咁鍾意填詞。」
最驚衰收尾
結果開始了填詞之路，寫下一首首金曲，直至90年代減產，他豁達說：「唔係我減少，人哋搵唔搵你，唱片公司有佢哋商業因素，所謂改朝換代，講真你𠵱家要我寫《風繼續吹》、《偏偏喜歡你》，自己都毛管戙，幾十歲伯爺公仲寫初戀情懷咩，有句說話叫衰收尾，幾十年功夫因為一首歌做得唔好，自己都要好小心好謹慎。」
