「神奇小子」曹星如（圖）嘅打不死精神，贏盡港人歡心。29歲嘅曹星如最近接受馬會刊物《駿步人生》訪問，大談發奮歷程，佢話小時冇方向，至愛打波同打機，細細個就打工搵食，搬貨、跟車同倉務等乜都做過。到17、18歲時獲拳擊教練邀請加入拳館做助教，先展開自己嘅奇妙人生，開始覺得自己好多不足，例如英文唔好，指導外國客人時應付唔到，開始覺得要做好自己。
24歲先做全職運動員，為咗追番起步較遲嘅差距，佢每日要操4至6粒鐘；放棄嘅念頭成日喺腦海出現，但自己會諗：「只要堅持，是可以捱得過的。」 由第一場職業賽事得300人入場，到最近一場有3,000人捧場，佢話好感動，勉勵年輕人向自己目標出發。