原籍愛爾蘭的郭能這天停賽期滿復出，頭場熱一熱身，第二場四班1200米草地，郭能即以新座騎姚本輝馬房「奮鬥雄心」勝出，此駒排14檔照贏，5.2倍啡燈Win順利開出，組合獨贏A3派20.5元，落飛黨在Win彩池扣本後進賬約1000萬。
「奮鬥雄心」賽前一年內冇贏過，其間用過大大小小好多位騎師，搏來搏去得個桔，今次乃缺陣近半年復出，搵有拼命三郎之稱的郭能操刀，閘前票如雨下，落飛黨完全唔將14檔放在眼內。結果「奮鬥雄心」由原本廿幾卅倍，跌到得番5.2倍開跑，係啡燈次熱門，跑落果然有料到，沿途居前，直路中段已於外叠掟甩對手鎖定勝局，五歲馬就此打破一年齋缽，大勝近三馬位，亦幫郭能復出即贏馬，補償早前停賽損失。
今場最熱門為方嘉柏馬房「好醒」，連續第二仗配田泰安後上不及又係第二，馬主王經緯今季仲未有頭馬拉，惟有繼續努力。三、四名分別為「包勝」及「一追再追」，四重彩派八萬四千幾。