這天沙田日馬乃係一年一度沙田錦標大日子，戲肉之一為第七場草地1200米二級賽精英碗。結果澳洲騎師柏寶夥拍呂健威馬房「幸運如意」後上奪冠，五歲短途良駒久休五個月復出即大熱取勝，單Win及組合獨贏A1分別派30及17.5元。
由女馬主溫佩珊揸弗的吉祥團體名下「幸運如意」上仗於今年5月1日，在國際G1主席短途獎僅不敵澳洲短途王「尚多湖」屈居亞軍，今次復出選戰已升格國際G2的精英碗，於柏寶胯下直路雖從最外叠入彎，蝕位蝕到阿媽都唔認得，惟最終仍能以後發先至，連追近10匹馬，超越所有對手並力拒蘇兆輝座騎「華恩庭」來犯先過終點，「華恩庭」輸頸位，上仗「華恩庭」由柏寶建功，今仗柏寶不騎而揀「幸運如意」，果然眼光獨到。
「幸運如意」榮膺今季首匹國際二級賽盟主，累積12戰6冠3亞1季，當中不上名兩仗分獲四、五名，在港出賽至今每次都有獎金，總獎金升至接近1,300萬元，表現十分出色。
蔡約翰馬房新勝國慶盃的「華恩庭」拉士從「幸運如意」內側如飛殺上，可惜追唔過後駒未能捧盃連捷，蘇兆輝亦繼第五場「華美之友」後再做二奶。今場三、四名順序為「友瑩格」及「誰可拼」，四重彩派四萬一千幾。