WTA年終賽周日喺新加坡正式展開，身處紅組嘅一姐姬芭喺首日分組賽，就俾斯洛伐克嘅施寶高娃嚇出一身冷汗！呢位28歲球手首盤要打到「搶七」先以7:6拔頭籌，點知第二盤就以2:6輸畀27歲嘅施寶高娃；好彩佢喺第三盤兩次打破施寶高娃嘅發球局，終於以6:3險勝，激戰咗接近兩個半鐘先分出勝負。
羅馬尼亞嘅哈蕾普喺同日另一場紅組分組賽，面對首次打入年終賽嘅美國球手姬絲就毫不手軟，用咗大約一個鐘就以直落兩盤6:2同6:4贏波。至於喺上周六贏得克里姆林盃冠軍、喺最後一刻搶得年終賽入場券嘅古絲妮索娃，周日亦飛抵新加坡，呢位31歲俄羅斯球手會喺周一白組分組賽首戰，硬撼衞冕嘅波蘭女將拉雲絲卡。