𠵱家做主席，認真唔容易，好似港鐵主席馬時亨咁吖，噚日何文田站啟用，佢都去視察。其實肥馬同何文田好有淵源，皆因佢都係愛民邨居民，所以好開心延綫噚日開通，而且有咁多居民捧場，佢噚日舊地重遊，仲去埋愛民茶餐廳tea一tea。
而佢由港鐵站行去愛民邨時，忽然主動話唔搭𨋢，改行樓梯；嘩，5層樓喎，據聞在場唔少記者索晒氣，反而主席行得好快，跟都跟唔切。馬太今日都有一齊行，上咗幾層之後，以為到嘞，點知只係行咗一半；其他人見佢有啲吃力，建議馬太改為搭𨋢直達目的地。肥馬噚日容光滿面，梗係啦，因為佢繼6月初嘗外公滋味，啱啱過咗嘅星期六，榮升咗第二任外公呀，孫女七磅13安士，難怪佢喜孜孜。