連捷馬係今個季初的稀有動物，這天賽前僅得蘇偉賢馬房「添好運」日前完成此舉。不過跑馬講實力，有得一匹梗有第二匹，這天第六場三班1200米草地，便有賀賢馬房頂頭大熱「京京千里」由潘頓取得連捷保持不敗，四歲本地拍賣馬1.6倍再下一城，組合獨贏A1同單Win，一樣都係派16.5元。
從澳洲進口的「京京千里」來自今年本港拍賣會，由內地新馬主劉玉文以850萬高價投得，成為應屆拍賣會標王。上仗9月18日初出即贏四班田草1200米大勝四馬位，當時獨贏熱到只有1.5倍。今次再配潘頓於同一路程上跑高一班，沿途留住跑，直路最後200米左右開始發力，「京京千里」最終以勁勢排眾而前，潘頓冇乜點騎，馬兒仍行過對手贏近三馬位，順利連捷保持不敗，上次有為劉玉文撐場的呂良偉，今次亦有拉頭馬。看來「京京千里」的潛力，隨時可媲美同一屆拍賣會600萬的絕對好馬「巴基之星」。
呢場開出熱頭冷腳，亞軍由118倍蘇保羅馬房初出馬「友誼之星」後上拎到，臨場因梁家俊墮馬受傷換蘇兆輝的「閃耀鑽皇」跑第三，第四名為次熱門「嫡愛寶」，四重彩派四萬四千幾。