這天沙田錦標賽馬日唔止有好幾位騎練起孖，就連馬主李嘉欣老爺許世勳都唔執輸，佢於第四場靠羅理雅贏出蔡約翰馬房「翔惑」後，最尾第十場二班1800米草地，憑告東尼馬房「期惑」配郭能食尾糊埋齋起孖，此駒在港第22次出賽，終在初嘗勝果，單Win及組合獨贏A1分別派79.5及22元。
郭能這天連同第二場姚本輝馬房「奮鬥雄心」，亦告一日兩捷，「期惑」更加幫佢奠定勝局，後來居上力壓雷神，勝出這天騎師王，可謂錦上添花。
「期惑」出名難贏兼有兩度筮咬「凱旋生輝」前科，告東尼曾被競賽小組召見，並告知若此駒再於陣上咬馬，有機會強制退役。不過，今場拉士從外叠望空殺上，零零丁丁一隻單獨表演卻跑得好規矩。許世勳今日冇到場，第四場「翔惑」由其子許晋亨拉頭馬，可能亨亨貴人事忙等唔到尾場已離開，並冇為「期惑」拉頭馬。
尾場跑第二是榮智健名下大熱門「東方快車」，呢條Q有12倍相當不俗，三、四名則由一對華將大冷馬瓜分，順序為「觀自在」（黃皓楠）及「超有利」（黎海榮），四重彩派18萬幾。