香港百物騰貴，好似領展（823）旗下的街市成日加租，趕絕小商戶，屋邨住戶自然要捱貴餸。但人類總要重複同樣的錯誤，難得領展仲有勇氣在旗下街市搞個「家常便飯鬥一餐」，叫人用廿蚊budget喺領展街市買餸，設計有營養價值的兩人份量一餸一湯食譜喎。
華華睇到呢個食譜比賽，立即倒抽一口涼氣。翻查最熟悉午餐肉價格的工聯會，其最近公佈的第三季「兩餸一湯」指數，連蕃茄的平均價格都按年上升9.37%，要煮三至四人分量的兩餸一湯，價格全線高企100元以上。據消委會網頁，娃娃菜最平一包都要7蚊，番茄一磅都近8蚊，雞翼一磅都十幾廿蚊，真係粗粗哋滾個頹湯、煎幾隻雞翼都容乜易out budget，仲要有營養又創新？有時華華去街市買豬肉切得少，仲要睇豬肉佬面色，領展要做到廿蚊一餸一湯，最重要嘅係要喺佢旗下的街市買食材，難度真係十級高，有啲「何不食肉糜」feel囉。