AC米蘭近年被視為「過氣球星同免費球員集中地」，但今時今日已經唔係呢回事，今季由少帥蒙迪拿領軍嘅AC，平均年齡係近30年嚟最低，繼「新保方」、17歲門將基安盧基當拿隆馬之後又有新星上位，18歲中場文路爾盧卡迪利喺上周六意甲射入世界波，助AC喺主場爆冷1:0擊敗祖雲達斯，青春風暴大爆發。
平均年齡30年新低
除咗當拿隆馬同盧卡迪利，今場波AC正選陣容仲有唔少後生仔，21歲中堅阿利斯奧羅馬洛尼、24歲迪施基利奧、21歲麥巴耶尼安同22歲嘅蘇索，正選平均年齡唔夠26歲，要數AC有咁後生嘅正選平均年齡，已經係85/86球季嘅25歲零三個月。
成場波形勢上AC唔算佔優，上半場祖記嘅比真歷曾經射入自由球，但球證商議後指客軍越位在先，推翻之前判決。到65分鐘，盧卡迪利喺禁區角接應蘇索傳送，帶波入禁區後勁射，保方波皮都掂唔到，皮球喺遠柱網側入網。加上當拿隆馬幾次出色撲救，幫AC保住清白之身，鎖定1:0勝局。着73號球衣嘅盧卡迪利，喺今季意甲入咗兩球都係靚波，佢賽後話：「我好似仲未係好清醒，可以射破世界最佳門將十指關，真係好正，真係急不及待要睇入球重播。」
蒙迪拿領軍有料到
今季接手執教AC、年僅42歲嘅蒙迪拿五年前喺羅馬展開執教生涯，一路以嚟領軍能力都得到唔錯評價，AC贏波後，𠵱家喺次席只係落後祖記兩分，真係有料到。蒙迪拿賽後話：「老實講我真係好激動，見到班球員完場後咁興奮慶祝，好多回憶都返晒嚟。不過之後我同佢哋講，𠵱家要當係新季開始，因為其他對手對AC嘅睇法已經唔再一樣，對住我哋必定會嚴陣以待。」