中產及富有階層時下流行「贏在起跑線理論」，幼稚園時期就將兒女送往不同地方學習，到咗中一啫，就話要送子女到英國讀寄宿學校，免遭本港教育制度摧殘咁講，總之各師各法，人人有不同嘅子女學習安排。
沙田陳太接孫女放學，俾一位相熟家長問起：「下晝你個孫學乜嘢呀，會唔會再去一家本地幼稚園呀？」沙田陳太話冇、唔會，但孫女精力過剩噃，父母還是替佢報咗兒童畫班與唱歌班。
與一位中環股票炒房人士傾起，問佢有冇傑青咁叻，已經供完樓？本來斯文人唔應該講呢啲嘢，但香港午飯時間，人人都講樓價股價及仔女嘅啦，大男人唔通講婆媽電視連續劇咁冇出息？呢位炒房老友已經好熟嘅嘞，大家言語不禁，佢話：「實不相瞞，我係月光族，月月清，要供樓啦、交稅啦，乖仔讀幼稚園及不同興趣班，每個月已要兩萬銀埋單，我一年敢去一次短程旅行嘅咋！」乜細路仔用咁多錢呀，只因乖仔太叻，每星期學七樣嘢，包括鋼琴、小提琴、畫畫、幼兒數學基礎、游泳、網球及英文補習。左丁山聽見都嘩，叫佢cut番一啲，但炒房B話：「我都有同乖仔傾過，但佢話樣樣都好玩，佢應付得來，而且個個先生都讚佢！」
哦，家有「神童」就要用多啲錢嘞，他日會係十項全能噃，今年只得五歲，他日成為朝陽新星都未定。不過有一項弱點噃，就是兒子唔喜歡中文，令炒房B頭痛，問左丁山有何方法。左丁山話：「一係學陶傑，冇中文必須好呢個心理負擔，一係搵啲漫畫中文書引吓佢，希望慢慢改變佢對中文嘅態度。」炒房B話：「我afford 唔起學陶傑呀，我自問冇咁叻，不如試吓叫佢睇漫畫中文先，唔得先至再諗，有乜漫畫好介紹？」肥仔K就係自小睇蔡志忠嘅漫畫論語、漫畫莊子嘅，現代一啲嘅漫畫書有馬龍（別名馬星原）與老婆方舒眉合作嘅漫畫家中文書系列，譬如手頭上有三本，預備遲啲送俾沙田陳太教孫女嘅，有「成語漫畫1」、「趣味學古文」先秦篇，以及「智者日常」。呢啲漫畫中文書對幼稚園生可能程度高一啲，未必啱炒房B用，小學生就可以開始由父母每晚教讀嘞，當作每晚臨睡前講一個故事之嘛，內地已有小學生開始誦讀三字經與千字文啦！用咁嘅方法培養兒女對中文嘅興趣，百分百肯定比送佢地去西崎崇子與姚鈺嘅小提琴學校便宜得多，唔會令自己月光光。