好多人以為馬雲做生意叻，賺女人錢叻，但原來佢捉賊仲叻（但打假貨就好難？）。事關佢近期教大家咪做「事後諸葛亮」，做吓「事前諸葛亮」，要用大數據捉壞人！
正所謂騙徒手法層出不窮，可能馬雲都聽過，佢話現實世界唔同電影，壞人好難分，唔想事後後悔就要利用大數據。佢就教公安大哥用數據預判，好似一個人買高壓鍋（壓力煲）好正常，買鐘都好正常，買鋼珠都正常，甚至買火藥都好正常。但當一個人同時買咁多嘢就肯定有啲嘢喇！
佢仲話以前冇高科技，公安好low-tech要日跟夜跟，但𠵱家有咗電子支付，只要警察用大數據發現有人一天內坐了50架不同公交車轉來轉去，就知個人好可疑喎。咁係咪即係建議公安長時間check住啲市民去邊，用來預防罪案呀？真係好有中國特色的方法囉。
上星期消委會仲擔心緊港版支付寶會永久保留客戶資料，支付寶其後急急澄清，話只係一場誤會，重申客戶資料只保留7年。睇完馬雲呢番見解，唔知顧客會有咩感想呢？