望穿秋水，市場一直「既盼且驚」的債轉股方案，早前終正式出台。不知是市場壓力太大，或者是怕對市場構成太大壓力，最終方案（姑且稱最終方案，因決策可因據上位者意願不停改）居然不用「內銀股東埋單」，改為內銀只須將債權售予資產管理公司，再由資產管理公司將債權轉成股權。
債權轉成股權，不代表問題成功解決，仍要找人「埋單」，所以資產管理公司會按法規參與「債仔」公司營運，等業務重回正軌後，資產管理公司就利用上市、股權轉讓或併購等方法退出。按中央債轉股劇本，資產管理公司理應「有錢賺」，又可將中國「浸到上頸」的債務問題解決，皆大歡喜。
世事真的如此理想？基金朋友跟密西比說，理論往往都動聽，但實施下來，問題就會如洪水般湧出來。他說：「邊個定價？真係可以干涉營運？國企點算？同埋最緊要嗰部份，邊個食咗個還唔到嘅債？聽講話，有人已密鑼緊鼓想將啲債，包裝成類似次按嘅混合債攞嚟香港賣，唔好話唔關你事。」果然是債多人不怪……
密西比