政治嘅嘢，可以有唔同觀點、立場，但大是大非就應該非黑即白。特首梁振英5年前嘅今日，喺公開場合被傳媒問到對六四嘅立場，當時佢話：「我之前講過幾次，目前冇補充。」
話鄧小平應攞和平獎
上任之前對六四講過啲乜？遠至1989年6月7日，佢同一群財經界人士喺報紙發聲明，「我們強烈譴責北京當局濫殺市民的冷血暴行，並沉痛哀悼為民主進步的中國而犧牲的愛國同胞」。近至2010年11月喺論壇上話，六四係悲劇，但未清楚所有真相，而如果有一個中國人要攞諾貝爾和平獎，「點解第一個攞諾貝爾和平獎嘅人，唔係鄧小平先生？」
點解由當年嘅譴責，對後來變成唔敢正面答？除咗選特首要阿爺撐，係咪原因之一？觀乎佢呢5年對六四事件唔係冇補充、就係不評論，若然成功連任，相信繼續迴避不談。