救星嚟到？中國足協噚日傍晚喺官網宣佈，同意大利名帥納比簽約，搵「銀狐」嚟教國足。68歲嘅納比噚日上晝到香港，之後就去廣州，同中國足協主席蔡振華見面，睇嚟雙方一早就傾好晒條件，所以即日就已經落實。官方聲明話納比星期五會喺北京開上任記招，但冇講人工同合約年期。內地傳媒披露，納比嘅合約為期三或四年，年薪約2,000萬歐元（約1.68億港元）。
中超球會廣州恒大為咗幫國足請納比，都犧牲咗唔少，恒大諗住下季搵納比返嚟做教頭，但如今足協出到聲，恒大只好忍痛割愛。恒大噚日晏晝發聲明，話同納比喺今年八月簽咗份合約，但經雙方協商下，家陣就解除合約。除此之外，恒大仲派高層劉永灼落香港接機，去到廣州之後，班主許家印仲親自迎接。盛傳恒大仲會幫手出納比份糧，真係出錢又出力。
國足喺世盃外亞洲區12強賽四戰不勝，以一分排A組包尾，前主帥高洪波喺上場作客不敵烏茲別克0:2後請辭。納比係球壇名帥，拎過意甲同歐聯冠軍，最威水就係2006年帶領意大利奪得世界盃。據報請納比首要任務係想歸化外援，睇吓阻力重重下能否成事。