周星馳經典港產笑片《國產凌凌漆》有種武器「蠱惑的槍」，子彈可以喺槍頭同槍尾射出，今期(23日)沙田賽事都有匹「蠱惑的馬」，就係第三場四班1400米、姚本輝馬房匹新勝馬「王者再現」。
「王者再現」服役僅三戰，上季跑過兩場毫無走勢，分別跑第9同第12名，上場作季內復出，閘前竟然由60多倍，急劇落至32倍，馬兒亦飛到馬到，沿途居後，喺直路殺上越騎越有取勝，贏馬功臣愛爾蘭猛將郭能都話嚇咗一跳，因為「王者再現」試閘顯得懶洋洋，死騎爛鞭都唔多願意用力加速，估唔到正式比賽突然充滿角逐興趣，同試閘比較係兩隻馬。
郭能話「王者再現」性格太聰明，識得分幾時係晨操，幾時係出賽，就算上場贏完，再騎呢匹4歲馬快跳及試草地，都係唔太願意出力，既然咁蠱惑識晨操慳力，到今次應會轉番個「出賽mode」，郭能直言以佢上場贏馬姿態，仍留喺4班好有利，就算抽到14檔都唔好低估喎！