外面橫風橫雨，衝唔切去超巿與街巿搶貨？唔緊要！就算家中只剩低一個杯麵，只要配合一些簡單食材，已經唔駛頹食，可以對自己好啲！
方法一：牛奶代熱水
先把牛奶煮沸，替代熱水淥麵，可以令杯麵的湯底更鮮甜，減少味精的油膩，而且冇咁鹹。
方法二：日式蒸蛋
食完個杯麵仲有啲肚餓？啲湯都唔好浪費啊，只要把食剩的湯底，倒入已經攪拌好的雞蛋，再放進微波爐叮約2分鐘30秒，熱騰騰又嫩滑的日式蒸蛋就會呈現於眼前。
方法三：加蛋加葱花
有時用熱水淥杯麵，感覺真係好頹，其實只要加隻雞蛋，臨食前再撒一點葱花。單憑賣相已經加晒分，加上半生熟的蛋漿與麵條混合後，味道的確十分配搭，而且葱花的香味有錦上添花的作用。
打風買唔切餸，其實煮個杯麵都可以好好吃，無謂要別人在強風下為你送外賣吧！
記者：黃凱婷、吳業紅
攝影：周旭文
