意大利名帥納比接手國足，相信已經係公開嘅秘密，據報佢嘅長期助手、喺意大利球會克雷莫納做總監嘅前恒大助教蘭普拉，亦都已經辭職，準備同師傅去中國打江山。納比亦都喺下周去到北京，準備同中國足協高層傾合約。
對比2,000萬歐元（約1.68億港元）年薪，納比更關心就係權力問題，因為佢要求擁有絕對權力，包括用人、點兵等，絕不希望中國足協高層干預，而初步納比合約係四年，目標都係放眼2022世界盃。中國「水浸」，據報亦有中超球隊開到1,000萬歐元年薪，力邀前西班牙國家隊教練迪保斯基做教練，不過迪帥想休息，嫌錢腥拒絕咗。另外，亦有傳中超球隊想搵前英格蘭領隊鶴臣任教。