所謂「只見新人笑，不見舊人哭」，曼聯領隊摩連奴上任初期就不時稱讚隊長朗尼，不過呢位英格蘭前鋒似乎越踢越唔掂，而全球最貴球員保羅普巴，就越踢越起勁；周四歐霸盃A組分組賽，紅魔主場大勝費倫巴治4:1，其中上半場獲得兩個12碼，但以往擔任劊子手嘅朗尼，竟然完全冇份射，佢要平雲尼斯達萊嘅歐洲賽入球紀錄就要再等等，相反普巴射入第一個12碼之餘，再射入一個靚波，梅開二度，呢期當然最得到摩佬歡心。
紅魔大炒沖喜等鬥車仔
曼聯10月踏入魔鬼賽程，周一先至作客悶和利物浦0:0（見附表），聽日聯賽又要鬥車路士，不過呢場歐霸盃一樣出強陣，迪基亞、基斯史摩寧、普巴、桑馬達等都正選，喺英超失正選嘅朗尼，今仗終於擔正兼踢番久違咗嘅箭頭位置。
呢場波形勢幾一面倒，曼聯大勝都冇乜特別，閃電被炒嘅前英格蘭國家隊領隊艾拿迪斯都係座上客。場波最有花生味就係兩個12碼嘅主理人，31分鐘桑馬達博得12碼，朗尼只要多入一球，就可以追平雲佬38球嘅曼聯歐洲賽累積入球紀錄，不過行去12碼點竟然係普巴，只見呢位法國中場勁射入網，繼代表法國對荷蘭一箭定江山，個人近三仗有兩場入波。
第二球寧畀馬迪爾操刀
三分鐘後，曼聯再由安東尼馬迪爾博到12碼，呢次仲唔係朗尼射？點知主射嘅係就係換咗人，不過就由普巴換馬迪爾，馬迪爾射入下領先到2:0。之後普巴同連格遠射建功，曼聯領先到4:0；前曼聯射手尹佩斯83分鐘幫費倫巴治破蛋，叫做倒戈奧脫福拎番個安慰獎。
朗尼踢足90分鐘又交白卷，睇怕下場對車仔都係打番後備。賽後對於兩個12碼都冇預朗尼，有唔少講法，英國報紙就話係朗尼讓畀普巴射，連前曼聯前鋒奧雲都鬧朗尼心態唔夠強。不過摩佬賽後就話，普巴根本就係球隊首席12碼劊子手，佢入第一球都好靚，不過三分鐘後再有12碼，普巴唔想重複，就讓畀隊友射，摩佬話呢個係畀球員自由決定，既然普巴選擇讓出主射權，當然讓畀同胞馬迪爾啦，朗肥？諗都唔好諗。
點都好，曼聯喺10月呢個魔鬼賽程，終於喺打和史篤城同利物浦後，拎番場勝仗，聽日作客車路士，摩佬倒戈史丹福橋，牙骱味認真濃，據英國《郵報》報道，車仔球會希望減少球迷帶支持摩連奴嘅標語入場，唔想球迷仲懷念呢位昔日領隊，而車路士領隊干地就話，隊長泰利已經夠fit，有望復出。