曼城喺周三歐聯C組作客巴塞隆拿，領隊哥迪奧拿執教曼城後首次「回家」，堅持一貫踢法同巴塞對攻，由後防組織上去；原本形勢唔錯，但門將哥迪奧巴禾派膠領紅，搞到曼城以0:4慘敗，以前比歷連尼帶隊對巴塞都冇輸得咁甘。
曼城雖然先收起阿古路，但踢法好進取，一於同巴塞鬥攻；初頭踢得係威係勢，但防中費蘭甸奴17分鐘喺自己禁區跣低，美斯輕鬆攞到波開紀錄。曼城之後都有攻勢，但洛尼圖同根度簡嘅攻門都過唔到達史特根，半場落後0:1。
「收山嗰刻都唔會變」
諗住落後一球，哥帥換邊後應該有計反撲，但愛將派膠，真係乜戰術都冇用。53分鐘，智利門將巴禾出到禁區踢一腳波，諗住遵從哥帥哲學，搓番個波畀後防，但唔知係學藝未精定仲當蘇亞雷斯係隊友嘞，竟然兜口兜面畀咗個波阿蘇；阿蘇即刻笠射，而巴禾就喺禁區外跳起用手擋波，被罰紅牌。曼城踢少個後終於頂唔順，美斯整多兩粒大演帽子戲法，拉開到3:0；雖然巴塞之後有馬菲奧被逐，尼馬又射失12碼，但呢位巴西鋒將喺89分鐘埋齋，巴塞主場大炒曼城4:0。
賽後網民狂插兩個「哥迪奧」，一個係巴禾，一個就係哥帥；有人講笑話，被放逐去拖連奴嘅赫特應該掩住半邊嘴笑。巴禾賽後都知衰：「我被逐改變咗比賽形勢，之前我哋踢得好好。」至於哥迪奧拿就繼續死撐愛將同佢嘅風格，「我唔會變！到我收山嗰刻，我都會踢呢種足球，由門將開始慢慢搓上去攻。我同巴禾傾過，佢好失望，但比賽就係咁。」曼城三戰得四分，喺C組排緊第二位，但各項賽事已經四場不勝喇。
另外，巴塞後衞碧基同佐迪艾巴傷出，前者應該要唞三星期，後者就養傷兩周。