興證國際（8407）噚日上市，招股期間一直冇現身嘅市場拓展部聯席董事周嘉儀（Venus）終於現身！
佢特登着條深藍色新裙，襯番公司隻corporate colour，裙上嘅金線刺繡好有喜慶味道㖭。想入貨嘅粉絲，就唔使諗喇，佢係旅行時買嘅，香港冇貨，價錢只係四位數字。
Venus本來喺大台做主播，轉工加盟興證已經一年半，佢話終於見到公司上市，「老闆（董事長蘭榮）敲鑼嗰刻，都幾激動」。
佢仲預告，年底會推出「興證會」，聯誼客仔同公司感情，唔單止搞財經講座，可能會約埋打golf之類。本身冇財經底子嘅佢，喺同事支持下慢慢適應新崗位，辛苦得嚟好有滿足感咁話。
