中環有唔少隱世公司廚房，除咗恒生（011）、上商等銀行總行有出色嘅廚房之外，原來友邦廚房都有五星級酒店水準。
友邦大廚劉偉耀師傅喺友邦做咗9年，之前係Ritz Carlton等五星級酒店做過，雖然成個廚房得5個廚師，但設備齊全。友邦員工如果要舉行宴會，喺友邦大廈33樓book個場就搞掂，中西餐都難唔到佢哋。
華華試過劉師傅手勢，食物確有水準，尤其係劉師傅嘅芒果糯米糍，真係十分足料。噚日劉師傅又有新搞作，第一次喺33樓舉行high tea。
友邦香港及澳門首席執行官陳榮聲（Jacky）指，因為最近公司推出新產品，本身有買指定儲蓄壽險嘅客戶，唔使核保就可以從三款附加保障中揀一款，所以噚日舉行記招，特登叫師傅配合，設計3層high tea，劉師傅果然瓣瓣掂。