「海馬」來勢洶洶，今日喺九龍公園泳池舉行嘅學界D1泳賽，首次實施「持票入場」，由以往冇限制入場人數改為參賽學校各獲100張門票，比賽未展開已有反對聲音，驚氣氛受影響；香港學界體育聯會秘書長何劍暉回應指，為安全計冇得選擇，前學界D1明星泳手歐鎧淳同施幸余都撐人流管制。
今日D1初賽好可能因為「海馬」襲港要延期，何劍暉噚日話，如果朝早六點半掛三號或以上風球，全日初賽都會取消，延至本月28日舉行。對於「持票入場」出現反對聲音，何話：「其實舊年D1泳賽之後，我哋收到好多家長投訴，話泳池太多人，易生意外，安全問題係我哋最大關注；好似舊年咁，每條通道都塞滿人，如果有事發生真係好難疏道。」學體會今次係經過比賽管理委員開會後，決定「持票入場」，22間參賽學校各分配100個名額，如果有學校用唔晒，學體會就會將餘額再分出去。
